Dane Paulus sareng Dane Barnabas Midartayang Orti Rahayu ring Kota Ikonium
14
Ritatkala dane Paulus sareng dane Barnabas rauh ring Kota Ikonium,
dane raris rauh ring bale wantilan agama Yahudine lan irika dane becik pisan ngajahin anake akeh.
Punika mawinan akeh anak Yahudi sareng anak nenten Yahudi dados pracaya ring Sang Hyang Yesus.
2 Nanging wenten pada anak Yahudi sane nenten pracaya ring Sang Hyang Yesus.
Ipun ngutsahayang mangda anak sane nenten Bangsa Yahudi gedeg kapining para krama druen Sang Hyang Yesuse.
3 Dane Paulus sareng dane Barnabas sue meneng ring kotane punika,
tur dane sareng kalih wanen midartayang pengajahan indik Sang Hyang Yesus.
Irika raris Sang Hyang Yesus ngicen kuasa nglaksanayang praciri lan paindikan sane ngangobin mangda muktiang pengajahan indik wara nugraha Idane punika yakti patut.
4 Nanging wargane ring kotane punika nenten ja adung kantos palas dados kalih seka.
Wenten sane ngilonin anak Yahudi,
tur wenten sane ngilonin dane Paulus sareng dane Barnabas.
5 Raris anak Yahudi sareng anak sane nenten Yahudi miwah para pemimpin ipune pada adung jagi nyengsarain lan nimpugina makakalih para utusan Sang Hyang Yesuse nganggen batu kantos padem.
6 Nanging dane Paulus sareng dane Barnabas uning rencanan ipune sami.
Punika mawinan dane sareng kalih malaibang raga nuju kota-kota ring Wawidangan Likaonia,
inggih punika Listra lan Derbe lan wawidangan sane wenten irika.
7 Irika dane midartayang malih Orti Rahayune punika.
Dane Paulus sareng Dane Barnabas Midartayang Orti Rahayu ring Kota Listra lan Derbe
8 Ring Kota Listra wenten anak lanang sane nenten taen mamargi duaning batis ipune lumpuh ngawit saking lekad.
9 Anak lumpuhe puniki malinggih saha mirengin dane Paulus ritatkala mabaos.
Ritatkala dane Paulus nlektekin anake punika,
irika dane uning ipun madue kapracayaan prasida kasegerin.
10 Raris dane mabaos antuk suara sane keras sapuniki,
“Ngadeg ja jegjeg!”
Jeg pramangkin anake punika ngadeg tur mamargi cagcag-cigcig irika.
11 Ritatkala anake akeh nyingakin paindikan sane ngangobin malantaran dane Paulus punika,
irika raris anake akeh pada masuryak nganggen basa Likaonia sekadi sapuniki,
“Para dewa sampun tedun ring jagate marupa manusa.”
12 Raris anake irika nyambat dane Barnabas dewa Seusb inggih punika pemimpin para dewa anak Yunanine.
Lan dane Paulus kasambat dewa Hermesc inggih punika,
juru raos para dewa anak Yunanine,
santukan dane sane akehan mawicara.
13 Nah irika wenten candi dewa Seuse sane magenah ring pamedal kotane punika.
Raris rauh pada rsi dewa Seuse mrika makta lembu muani lan kalung bunga ka pamedal kotane.
Raris rsine punika ninutin anake akeh jagi ngaturang aturan ring dane Barnabas lan dane Paulus.
14 Mirengin indik parilaksanan anake akeh sekadi punika,
dane Barnabas sareng dane Paulus raris nguek penganggennyane dados tanda makakalih utusane punika nenten kayun kasungsung sekadi para dewane.
Raris ipun sareng kalih malaib ka tengah-tengah anake akeh punika saha mabaos keras sekadi puniki,
15 “Wih ragane makasami!
Kenapike ragane malaksana sekadi puniki?
Titiang sareng kalih manusa biasa pateh sekadi ragane!
Titiang sareng kalih wenten iriki jagi midartayang Orti Rahayu kapining ragane makasami mangda ragane nenten malih nyungsung para dewane sane nenten maguna tur mawali mabakti ring Sang Hyang Pengardi kamanten.
Krana Ida sane urip tur sane ngardi langit,
segara,
miwah jagate tur sekancan dagingnyane.
16 Idumun Sang Hyang Pengardi manggiang bangsa-bangsane sami nyungsung sesembahannyane manut manah ipun praragan.
17 Yadiastun sekadi punika,
Ida setata ngicen bukti indik Ida miara manusane inggih punika Ida mapaica paindikan becik sekadi sabeh saking langite lan asil tanah ritatkala masan manyine.
Lan Ida ngicen ajengan tur rasa liang ring manah ragane sami.”
18 Malantaran babaosan danene punika,
dane keras ngutsahayang mangda anake akeh nenten nyungsung dane sareng kalih.
Pamuputne dane sareng kalih mresidayang nambakin ipun sami ngaturang aturane punika.
19 Raris wenten pada anak Yahudi saking Antiokia lan Ikonium ngranjing ring kota punika.
Raris anak Yahudine punika ngutsahayang mangda anake akeh irika sareng-sareng nglawan dane Paulus.
Raris anake akeh punika nimpugin dane Paulus nganggen batu,
raris kapaid ka jaban kotane krana ipun ngaden dane sampun padem.
20 Nanging ritatkala para pengiring Sang Hyang Yesuse ngiterin dane Paulus,
raris dane matangi tur ngranjing malih ka kota.
Benjangane dane Paulus sareng dane Barnabas luas ka Kota Derbe.
21 Irika dane midartayang Orti Rahayune tur akeh anake dados pracaya ring Sang Hyang Yesus.
Dane Paulus sareng Dane Barnabas Mawali ka Kota Antiokia
Raris dane Paulus sareng dane Barnabas mawali ka Kota Listra, Kota Ikonium raris Kota Antiokia ring Wawidangan Pisidia.
22 Ring kota-kotane punika dane sareng kalih mituturin para pengiring Sang Hyang Yesuse mangda pageh tur setata pracaya ring Ida.
Raris dane mabaos sapuniki,
“Iraga musti nandang sengsara dumun,
mangda dados krama karajaan Sang Hyang Pengardi.”
23 Raris ring sebilang seka krama druen Sang Hyang Yesuse,
dane Paulus sareng dane Barnabas milih para penglingsir.
Raris sasampune wusan mabakti lan mapuasa,
para penglingsir punika kaserahang ring Sang Hyang Yesus sane pracayain ipun sami.
24 Raris dane Paulus sareng dane Barnabas nglanturang pamargin danene ngliwatin Wawidangan Pisidia raris rauh ring Wawidangan Pampilia.
25 Tur sasampune dane midartayang sabdan Sang Hyang Pengardi ring Kota Perga,
raris nuju Kota Atalia ring pasisi segarane.
26 Saking irika dane sareng kalih malayar budal ka Antiokia ring Propinsi Siria.
Kotane punika genah danene idumun kaserahang ring wara nugraha Sang Hyang Pengardi mangda dane nglaksanayang pakaryane.
Sane mangkin,
pakaryane punika sampun kapuputang olih dane sareng kalih.
27 Sasampune dane sareng kalih rauh ring Antiokia dane munduhang krama druen Sang Hyang Yesuse.
Raris dane sareng kalih nyeritayang sekancan paindikan sane sampun kalaksanayang olih Sang Hyang Pengardi malantaran dane.
Kenten pada dane nyeritayang indik Sang Hyang Pengardi sampun ngicen margi ring bangsa-bangsa sane nenten Yahudi mangda pracaya ring Sang Hyang Yesus.
28 Ring kotane punika dane Paulus sareng dane Barnabas sue meneng sareng para pengiring Sang Hyang Yesuse.